LAPF. YATOA SOMO KWA WATENDAJI WA RS MWANZA.

Mfuko wa Penshini wa LAPF kwa watumishi wa umma na wasio watumishi wa umma umetoa elimu kwa Waajiriwa waliopo katika Sekretarieti ya Mkoa wa Mwanza huku wakiwataka watumishi kujisikia fahari kujiunga na mfuko huo kwani ndio mfuko pekee nchini wenye kutoa mafao bora na kwa wakati.

Akitoa elimu kwa watumishi hao meneja wa LAPF kutoka makao makuu Abubakar Ndwata amesema kutokana na ubora wao, ndio maana watu wameendelea kuwaamini na katika mwaka wa 2013 walifanikisha kuwaunganisha wateja wapatao elfu kumi na moja(11,000) jambo ambalo wao wanalitaja kama ni mafanikio makubwa kuyafikia ndani ya kipindi cha mwaka mmoja.

Katika hatua nyingine Ndwata amesema Tanzania ndio nchi pekee yenye sera ya mifuko ya hifadhi ya jamii katika nchi zilizopo Afrika mashariki na kati na hii inatokana na Tanzania kuridhia mikataba mbali mbali kama ule wa ILO  namba 102 sera ya hifadhi ya mifuko ya jamii ya mwaka 2003 pamoja na sheria zilizoanzisha mifuko ya hifadhi ya jamii ikiwapo ile iliyo anzisha LAPF ya mwaka 2006.

Awali akifungua mafunzo hayo Katibu tawala msaidizi wa seksheni ya Utawala na rasilimali watu, Bibi Crescencia Shayo, aliwataka watumishi kuwa huru kujiunga na mfuko wanao utaka bila ya kulazimishwa “ Kwa hivi sasa kwa mujibu wa sera ya mifuko ya hifadhi ya jamii kila mtu anaye ajiriwa anayo hiyari ya kujiunga na mfuko anaoutaka hivyo basi mtumishi awe huru kuchagua mwenyewe na wapi anataka kujiunga na ninyi wenye mifuko kila mmoja abakie kueleza uzuri au ubaya wa mfuko anaotoka” alisema na kuongeza haipendezi kuanza kunyang’anyana wateja kwa njia ambazo sio halali mathalani kutumia rushwa nk.”.

Mfuko wa LAPF ulioanza mwaka 1944 chini ya iliyokuwa serikali ya Kikoloni ya Tanganyika ilikuwa kwa ajili ya wafanyakazi wa chini maakida na makarani kwa lengo la kuwawezesha kujiwekea akiba ulibadilishwa na kuwa mfuko wa hifadhi ya jamii kwa sheria namba 9 ya 2006 kufuatia mabadiliko ya kanuni ya kukokotoa mafao ya uzeeni sawa na yale yanayotolewa kwa wafanyakazi wa Serikali kuu.